Antton Dueso

Antton Dueso (Bardo, Manex Artia, Parra) (Pasai Donibane, 1962-) idazle, marrazkilari, argazkilari, ilustratzaile eta komikigile gipuzkoarra da. Euskadi Sioux eta Askatasuna aldizkarietan argitaratu zituen lehen lanak 1970. hamarkada amaieran. 1979an hasi zen Ipurbeltzen argitaratzen, "Itziar eta Patxi" pertsonaiekin lehenik eta "Prakestuak" sailarekin ondoren; Ipurbeltzeko argitalpenek eta hauei esker profesionalki irudigintzatik bizitzeko aukera izan zezakeela pentsatu zuen.Hamar urte geroago, 1989ko martxoan, hasi ziren argitaratzen Punkiren komikiak Ipurbeltzen, eta Duesoren pertsonai adierazgarriena bihurtu da, aldizkaria 2008an azken alea argitaratu arte iraun zuena eta komiki formatuaz gain eleberri formatuan ere argitaratu zena, 5 liburukitan 1997-1999 urteen artean lehenik eta ondoren 2007tik aurrera zenbait berrargitaralpenetan. Punkiren istorio eta komiki bilduma argitaratu zen 2013an. Duesoren lan askotan Aintzane Domenech arduratu izan da koloreaz. Migel Angel Elustondorekin elkarlanean aritu da euskaraz argitaratu dituen hainbat lanen egokitzapenenean. 90. hamarkadan Ipurbeltz/Superbat proiektuan Zuzendaritza Artistikoaren ardurak izan zituen Jose Mari Lopetegirekin lankidetzan, eta aldizkariaren erredakzio kontseiluko kidea izan zen Miel Angel Elustondoren Zuzendaritza garaian. Ipurbeltzeko azken alea 2008an argitaratu zen. Ipurbeltzen ibilbide profesionala abiatu eta gero, Euskal Herriko eta Espainiar Estatuko zein Galiziako hainbat argitaletxetarako ehun testu liburuetan baina gehiagoetan parte hartu du; batetik bere gidoiekin sortutako liburu ilustratuak egin ditu: Marimuki pertsonaia ere sortu zuen, komiki zein ipuingintzarako, guztira 25 lan baino gehiago.Euskal Herria, Katalunia eta estatu mailako hainbat egunkari eta aldizkaritan umore grafikoa eta komikiak egin ditu: Berria, Kaleidos, Zabalik, Aiurri, Eroski taldeko aldizkariak, Luma eta Lumatxo denbora pasen gehigarria...Bestetik hainbat idazleen testuetarako ilustrazioak sortu ditu: Andoni Egaña, Yolanda Arrieta, Harkaitz Cano... Dueso irudigintzaren hainbat esparrutan aritzen da: Ikus-entzunezkoak, marrazki bizidunak, argazkigintza, azalak, kartelak, publizitatea, helduentzako eta umeentzako ilustrazio lanak, denbora-pasak...

Iturria: Euskarazko Wikipedia (CC BY-SA 3.0)