Bixente Lizarazu

Bixente Lizarazu (Donibane Lohizune, Lapurdi, 1969ko abenduaren 9a - ) futbolari ohia da, ezkerreko atzelaria hain zuzen ere. Lizarazu hainbat taldetan aritu da. Bordeleko Girondinsen hasi zen. Haiekin 1996ko UEFA Kopa galdu zuen Bayern Munichen kontra. Hortik Bilboko Athletic Klubera joan zen. ETAren xantaia pairatu zuen, horregatik Athletic uztea erabaki zuen. Hamazazpi partida jokatu ostean, FC Bayern München taldeak erosi zuen. Talde horretan, 69 zenbakia sorbaldan, Alemaniako 6 liga eta 5 kopa irabazi zituen, baita Champions Leaguea zein Nazioarteko Kopa ere. Frantziako talde nazionalarekin ere arrakastatsua izan da Lizarazu, 1998ko Munduko Futbol Txapelketa nahiz 2000ko Europako Futbol Txapelketa erdietsi baitzituen. Orotara 97 aldiz aritu da bluesekin. Bixente Lizarazuk 2006ko apirilaren 30ean jakinarazi zuen futbolean jokatzeari utziko ziola, Zinedine Zidanek baino 4 egun geroago. Beltzenia estadioari bere izena eman zioten. Claire Keim du emazte, eta Tximista izeneko semea eta Uhaine izeneko alaba ditu. Bere anaia Peio Lizarazu surflaria da. 2018ko apirilean berak idatzitako liburua argitaratu zen Mes prolongations izenburukoa, Seuil argitaletxearekin (ISBN 978-2-02-137496-4), non kirolak, futbolaren historia, biografia eta euskal erroak jorratzen diren.

Iturria: Euskarazko Wikipedia (CC BY-SA 3.0)