Imanol Murua Uria

Imanol Murua Uria (Zarautz, Gipuzkoa, 1966ko martxoaren 28a - ) euskal idazle, kazetaria eta unibertsitateko irakaslea da. Euskal Herriko Unibertsitatean Informazio Zientziatan lizentziatu zen 1989an. Geroago doktore-titulua lortu zuen 2014an Euskal Ikasketetan, Renoko Unibertsitatetik (UNR), eta Gizarte Komunikazioan, EHUtik. Kazetaritzako irakaslea da EHUn 2015etik. Sei libururen egile eta lauren ko-egile da. Bere azken liburuan (Ekarri armak) ETAren jardun armatuaren bukaeraren kronika idatzi zuen 2015an. Bere doktorego-tesian gai horixe landu zuen ("The end of eta (2007-2011): narratives from the media and from the actors"), Txema Ramírez de la Piscina eta Joseba Zulaikaren zuzendaritzapean.1980ko hamarkadaren amaieran, Argia aldizkariaren bueltan euskarazko egunkariaren proiektuaren gaineko gogoeta sortu zenean unibertsitatetik irten berria zen orduan Murua, baina Argia-n kolaboratzen zuen ordurako, belaunaldi bereko beste hainbat kazetarirekin batera: «Denbora gutxi generamala, ohartu ginen egunkariaren ideia oso serio hartua zutela, egunkaria martxan jartzeko garaia zela erabakia zutela... Tokatu zitzaigun momentu egokian leku egokian egotea, beste batzuek pentsatu zutena martxan jartzeko». Egunkaria sustatzeko taldean zeuden Martin Ugalde, Iñaki Uria, Joan Mari Torrealdai, Nerea Azurendi, Pello Zubiria, Iñaki Uria, Josu Landa eta Joxemi Zumalabe bera. Argia astekarian (1987-90), Egunkaria egunerokoan (1990-1995 eta 1999-2003), Jakin kultur aldizkarian (1995-1998), Egunero egunkarian (2003) eta Berria egunkarian (2003- ) aritu da kazetari. Euskal Herriko Unibertsitateko irakaslea da, Gizarte eta Komunikazio Zientzien Fakultatean. Ikerketa- lana HGH Hedabideak, Gizartea eta Hezkuntza Ikerketa Taldean aritzen da.1996an Rikardo Arregi Saria jaso zuen, Erreportaje Sailean, Humberto Unzuetarekin batera, Irlandako bake prozesuari buruz Egunkaria-n argitaratutako lanengatik. 2006an, eta 2010ean ere, Rikardo Arregi Sari Nagusia jaso zuen, Berria egunkarian Politika Sailean idatzitako lanengatik eta "Loiolako Hegiak" liburua idazteagatik. 2008an prentsa idatziko Argia Saria jaso zuen, Berria egunkarian Politika arloan idatzitako lanengatik. Guztira 200dik gora artikulu argitaratu ditu Berria egunkarian. Berria egunkariko bere iganderoko asteko kronika hainbat urtetan erreferentzia nagusietako bat izan zen Euskal Herriko kazetaritza politikoan.12 artikulu luze ere idatzi ditu Jakin aldizkarian. 2014tik Jakin aldizkariko Kontseilu Editorialeko kide da.

Iturria: Euskarazko Wikipedia (CC BY-SA 3.0)