Santiago Cervera

Santiago Cervera Soto (Iruñea, Nafarroa, 1965eko martxoaren 27a) Espainiako Alderdi Popularreko politikari nafarra da. UPN alderdian zegoela, 1995ean Iruñeko alkategaia izan zen. Nafarroako Osasun kontseilaria izan eta gero, 2003an politika utzi zuen. Politikatik kanpo Espainiako Zentro Kardiobaskularreko zuzendaria izan zen. 2007an egun berean ospatu ziren Nafarroako eta Espainiako hauteskundeetan, UPN nagusitu zela, Miguel Sanz presidenteak Espainiako Kongresuan diputatu izateko eskatu zion eta onartu zuen. 2008an Espainiako aurrekontu orokorren bozketan UPNk izan zuen jarrera dela-eta dimisioa aurkeztu eta Nafarroako Alderdi Popularraren sorreran parte hartu zuen. Nafarroako PPko presidentea izan zen, harik eta 2012ko abenduaren 10ean hala espainiar kongresuko diputatu nola alderdikide izateari utzi zion arte, bezperan Guardia Zibilak atxilo hartu baitzuen gertaera rokanbolear baten kariaz. Izan ere, Nafarroako Kutxako presidente Jose Antonio Asiainek egindako salaketaren arabera, Santiago Cerverak sinatu gabeko mezua igorri zion 25.000 € eskatuz, harentzat informazio konprometigarria isilean gordetzearen truke. Guardia Zibilak zelatan jarri eta Cervera harrapatu zuen agindutako tokian bertan. Cerverak bere errugabetasuna mantendu zuen epailearen aurrean deklaratu eta gero ere.

Iturria: Euskarazko Wikipedia (CC BY-SA 3.0)